អេភេសូរ ៣
អាថ៌កំបាំងព្រះជាម្ចាស់ត្រូវបានបើកសំដែង
៣ហេតុនេះហើយខ្ញុំប៉ូល ជាអ្នកទោស ដោយព្រោះព្រះគ្រិស្ដយេស៊ូសម្រាប់អ្នករាល់គ្នា ដែលជាសាសន៍ដទៃ ២អ្នករាល់គ្នាពិតជាបានឮហើយ អំពីតួនាទីមើលការខុសត្រូវ ដែលជាព្រះគុណ របស់ព្រះជាម្ចាស់បានប្រទានមកឲ្យខ្ញុំសម្រាប់អ្នករាល់គ្នា ៣គឺព្រះអង្គបានបង្ហាញឲ្យ ខ្ញុំស្គាល់អាថ៌កំបាំងតាមរយៈការបើកសំដែងដូចដែលខ្ញុំបានសរសេរ ដោយសង្ខេបរួចហើយ ៤កាលអ្នករាល់គ្នាអានសេចក្ដីនោះ អ្នករាល់គ្នាអាចយល់បានអំពីចំណេះរបស់ខ្ញុំចំពោះអាថ៌កំបាំងរបស់ព្រះគ្រិស្ដ ៥ដែលមិនបានបង្ហាញឲ្យ កូនចៅមនុស្សជំនាន់មុនៗស្គាល់ ដូចដែលបានបើកសំដែងដល់ពួកសាវក និងពួកអ្នកនាំព្រះបន្ទូលដ៏បរិសុទ្ធរបស់ព្រះអង្គ នាពេលបច្ចុប្បន្ននេះ តាមរយៈព្រះវិញ្ញាណឡើយ។
៦តាមរយៈដំណឹងល្អ ពួកសាសន៍ដទៃត្រលប់ជាអ្នករួមស្នងមរតក ជាអ្នករួមក្នុងរូបកាយតែមួយ ហើយជាអ្នករួមចំណែកសេចក្ដីសន្យា នៅក្នុងព្រះគ្រិស្ដយេស៊ូ ៧ហើយខ្ញុំបានត្រលប់ជាអ្នកបម្រើដំណឹងល្អនេះ តាមរយៈអំណោយទាន ជាព្រះគុណរបស់ព្រះជាម្ចាស់ដែលបានប្រទានឲ្យខ្ញុំស្របទៅតាមអំណាចដ៏មានអានុភាពរបស់ព្រះអង្គ។
៨ព្រះអង្គបានប្រទានព្រះគុណនេះឲ្យ ខ្ញុំ ដែលជាអ្នកតូចតាចបំផុតនៅក្នុងចំណោមពួកបរិសុទ្ធទាំងអស់ ដើម្បីឲ្យខ្ញុំប្រកាសដំណឹងល្អ ប្រាប់ពួកសាសន៍ដទៃអំពីភាពបរិបូររបស់ព្រះគ្រិស្ដ ដែលវាស់ស្ទង់មិនបាន ៩និងឲ្យបំភ្លឺដល់មនុស្សទាំងអស់អំពីអ្វី ដែលជាគម្រោងការអាថ៌កំបាំង ដែលបានលាក់ទុកតាំងពីអស់កល្បនៅក្នុងព្រះជាម្ចាស់ ជាព្រះដែលបានបង្កើតអ្វីៗទាំងអស់ ១០ដើម្បីបង្ហាញឲ្យការគ្រប់គ្រង និងសិទ្ធិអំណាចទាំង ឡាយ ដែលនៅស្ថានសួគ៌ស្គាល់ប្រាជ្ញារបស់ព្រះជាម្ចាស់ ដែលមានជាច្រើនយ៉ាង នៅពេលនេះ តាមរយៈក្រុមជំនុំ ១១ស្របទៅតាមគម្រោងការដ៏អស់កល្ប ដែលព្រះអង្គធ្វើ នៅក្នុងព្រះគ្រិស្ដយេស៊ូ ដែលជាព្រះអម្ចាស់នៃយើង។
១២នៅក្នុងព្រះអង្គ យើងមានសេចក្តីក្លាហាន និងមានផ្លូវទៅព្រះជាម្ចាស់ដោយការទុកចិត្ត តាមរយៈជំនឿលើព្រះអង្គ។ ១៣ដូច្នេះ សូមអ្នករាល់គ្នាកុំរសាយចិត្ដដោយព្រោះតែសេចក្តីវេទនារបស់ខ្ញុំ សម្រាប់អ្នករាល់គ្នានេះឡើយ ដ្បិតគឺជា សេចក្ដីរុងរឿងរបស់អ្នករាល់គ្នាទេ។
លោកប៉ូលអធិស្ឋានសុំកម្លាំង
១៤ហេតុនោះហើយ បានជាខ្ញុំលុតជង្គង់នៅចំពោះមុខព្រះវរបិតា ១៥ដែលគ្រួសារទាំងអស់ ទាំងនៅស្ថានសួគ៌ និងផែនដីមានឈ្មោះមកពីព្រះអង្គ ១៦សូមឲ្យព្រះអង្គ ប្រទានឲ្យមនុស្សខាងក្នុងរបស់អ្នករាល់គ្នា រឹងមាំឡើងដោយសារអំណាច តាមរយៈវិញ្ញាណរបស់ព្រះអង្គស្របទៅតាម ភាពបរិបូរនៃសិរីរុងរឿងរបស់ព្រះអង្គ ១៧ដើម្បីឲ្យព្រះគ្រិស្ដគង់នៅក្នុងចិត្តរបស់អ្នករាល់គ្នា តាមរយៈជំនឿ ហើយសូមឲ្យអ្នករាល់គ្នាដែលត្រូវបានចាក់ឫស និងចាក់គ្រឹះនៅក្នុងសេចក្ដីស្រឡាញ់ ១៨អាចយល់ច្បាស់ជាមួយពួកបរិសុទ្ធទាំងអស់ អំពីទទឹង បណ្តោយ ជម្រៅ និងកម្ពស់ ១៩ព្រមទាំងស្គាល់សេចក្ដីស្រឡាញ់ របស់ព្រះគ្រិស្ដដែលហួសពីការយល់ដឹងដើម្បីឲ្យអ្នករាល់គ្នាបានពេញ រហូតដល់គ្រប់ទាំងសេចក្ដីពោរពេញរបស់ព្រះជាម្ចាស់។
២០សូមឲ្យព្រះអង្គ ដែលអាចធ្វើលើសលប់ហួសពី សេចក្ដីទាំងឡាយដែលយើងសុំ ឬគិត ស្របតាមអំណាចដែលកំពុងធ្វើការនៅក្នុងយើង ២១បានប្រកបដោយសិរីរុងរឿង នៅក្នុងក្រុមជំនុំ និង នៅក្នុងព្រះគ្រិស្ដយេស៊ូគ្រប់ជំនាន់ អស់កល្បជានិច្ច អាម៉ែន។